Regimen nobo di impuesto

For di dia 10 di october 2010 Bonaire, Saba y Sint Eustatius ta municipionan particular di Hulanda y parti di sistema gubernamental Hulandes. Esaki ta nifica cu oficialmente Hulanda ta responsabel pa cobramento di impuesto riba e islanan.

P’esey dia 1 di januari 2011 a introduci un sistema fiscal nobo cu ciudadanonan y empresanan por adapta facilmente. Ta bini medidanan generico mas tanto posibel, loke ta haci cu e sistema di impuesto ta bira mas facil. Ademas tarifanan ta baha y gobierno lo introduci un cierto cantidad limita di impuesto. Esaki ta haci cu e sistema aki di impuesto ta desvia for di e sistema cu ta valido na Hulanda.

Mas impuesto indirecto

Banda di esaki Gobierno kier introduci mas impuesto indirecto, na luga di impuesto directo. Si un pais ta cobra hopi impuesto directo (por ehempel riba impuesto di entrada, esta inkomstenbelasting), anto empresanan ta keda cu menos placa di nan ganashi. Trahadonan cu mester entrega mas impuesto di salario, esta loonbelasting, lo bay exigi un entrada bruto mas halto. Esaki ta un peso riba economia.

Si parti e mescla di impuesto den un otro forma, anto ta sobra mas placa pa e empresanan y pa e consumidornan, pa nan inverti den economia. Nan mester paga mas impuesto riba voluman di benta, esta omzetbelasting, pa mercancia cu nan cumpra. Durante ultimo añanan mas pais ta cambia impuesto directo pa impuesto indirecto. Na Hulanda por ehempel e impuesto di salario tabata e fuente di entrada mas grandi. Awo esaki ta e impuesto riba volumen di benta, esta e BTW.