10-10-10: un comienzo nobo pa islanan di Antiyas

For di diadomingo 10 di oktober Curaçao y St. Maarten ta pais nobo den Reino. Bonaire, Saba y St. Eustatius awor ta municipio ‘special’ di Hulanda. Pais Antiyas Hulandes no ta existi mas.

Na Willemstad, Curaçao mei anochi, diadomingo mainta seis or ora hulandes, a baha bandera antiyano. Prins Willem-Alexander y prinses Máxima a presencia e ceremonia na Plaza Brion. Gabinete hulandes a wordo representa door di secretario di estado Bijleveld (Relacionnan den Reino) y minister Van Middelkoop (Defensa). Na St. Maarten tambe tabatin un ceremonia oficial. Minister Hirsch Ballin (Husticia y Asuntonan Interno ) a representa gabinete hulandes eynan.

Secretario di estado Bijleveld a enfatisa den su discurso durante e festividadnan na Plaza Brion cu e cambionan estatal ta nifica un comienzo nobo pa e islanan. Un comienzo nobo, caminda bienestar di e poblacion ta na prome lugar. 'Nos a busca e forma- y reglanan adecuado pa un gobernacion confiabel, y a dedica masha atencion na loke pa hopi hende ta e preocupacion di mas grandi: seguridad y proteccion di ley, riba cual tur ciudadano di Reino tin derecho. Eseynan tabata e condicionnan cu nos tabatin den nos mente tempo cu a formula e relacionnan nobo den Reino, pero mas ainda: e relacionnan dentro di e paisnan nobo. Nos meta semper tabata crea un situacion cu lo hasi posibel, pa cada habitante percura pa su mes y pa su prohimo. Pa percura pa muchanan haña bon enseñanza y pa nan ta for di peliger; pa tur hende por traha na un futuro.