Minister Eurlings ta bishita Aruba y Antias Hulandes

Minister Camiel Eurlings di Trafico y Administracion di awa publico ta hasi un bishita siman cu ta bini aki na Antias Hulandes y Aruba.

E minister ta yega Corsow diadomingo 27 di juni. E parti oficial ta cuminsa dialuna mainta cu un bishita na gobernador Frits Goedgedrag y despues na ministerpresidente Emily de Jongh-Elhage, minister di Asuntonan Constitucional y Asuntonan Interno Roland Duncan y minister di Trafico, Transporte y Telecomunicacion Patrick Illidge. Cu su colega Illidge e minister lo firma un acuerdo di cooperacion. Merdia e mandatario lo tin un encuentro cu Conseho ejecutivo di Corsow.

Diamars mainta 29 di juni Eurlings ta bula bin Aruba caminda primeramente lo e bishita – hunto cu secretario di Estado Bijleveld-Schouten (Relacionnan den Reino) – gobernador interino Alicia Tromp-Yarzagaray. Eurlings lo papia tambe cu minister-presidente Mike Eman. Cu su colega Otmar Oduber, Eurlings lo sera despues un acuerdo tocante cooperacion riba tereno di control di trafico aereo entre Aruba, Corsow y e islanan BES pa cual Hulanda lo ta responsabel despues di 10-10-10. Ademas, Eurlings lo papia diarason cu minister Benny Sevinger tocante renobacion urbano na Oranjestad, y e ta bishita despues e haf di container y e haf na Barcadera.

Diaranson merdia e minister ta sali cu su delegacion pa Islariba. Prome nan ta bai Saba, caminda pa diahuebs mainta tin plania bishita na Conseho ejecutivo y ‘Regionaal Service Centrum’ (RSC). Parti di merdia Eurlings ta sali bai St. Eustatius, caminda lo e realisa un programa similar. Un dia despues St. Maarten ta riba programa, cu un bishita na gobernacion di e isla y na Servicio Meteorologico. E bishita di trabou ta termina na Boneiro cu entre otro bishita na Conseho ejecutivo y e empresanan di transporte Rocargo y Don Andres. Dialuna mainta e minister ta duna e tiru pa start renobacion di e pista di aeropuerto y di aterisaje na Flamingo Airport y e ta biaha bek pa Hulanda diamars atardi.