Secretario di estado Knops (Asuntonan Interno y Relacionnan di Reino) ta realisa un bishita pa cera conoci cu e tres islanan Aruba, Bonaire y Corsou for di dialuna dia 8 di januari te cu diadomingo 14 di januari 2018.
Durante su prome bishita na Aruba, Bonaire y Corsou, e secretario di estado lo cera conoci mas di cerca cu dirigentenan di e islanan y lo papia cu representantenan di sector comercial, e sector social y Organisacionnan No Gubernamental.
“Mi ta contento cu mesora na cuminsamento di 2018 mi por realisa un bishita na e parti aki di nos Reino”, segun secretario di estado Knops. “Despues di mi recien bishita na islanan ariba, mi ta haya cu ta importante pa cera conoci lihe tambe cu Aruba, Bonaire y Corsou. Mi kier uza e viahe pa mi por scucha dilanti di cua retonan e dos paisnan y e entidad publico ta para, cua ambicionnan nan tin y con nos lo por sigui duna forma na e cooperacion durante e periodo nos dilanti. Banda di esaki mi kier uza e bishitanan di trabou y e combersacionnan pa mi haya un impresion di e bida y e trabou riba e tres islanan.”
E programa di secretario di estado Knops ta cuminsa dialuna mainta dia 8 di januari na Bonaire. Diamars anochi dia 9 di januari e ta yega Corsou. Finalmente e secretario di estado ta realisa un bishita na Aruba. Aki e ta yega diahuebs dia 11 di januari den oranan di atardi.