Contribucion positivo di Fondo Desaroyo Aruba (FDA) na Comunidad di Aruba

Mayoria di e programanan di mas aña y proyectonan di Fondo Desaroyo Aruba a keda ehecuta efectivamente. Riba tereno di calidad di gobernacion, enseñansa y mantencion di ley, tin por ehempel desaroyonan positivo visibel y Aruba ta presta mihor cu otro paisnan di Caribe. Cu hopi proyecto di Fondo Desaroyo Aruba, a pone e fundeshi tambe pa mehoracionnan cu ta sigui y pa e impacto den futuro. Esakinan ta e conclusionnan mas importante den e Rapport Final di Evaluacion di Programanan di mas aña di Fondo Desaroyo Aruba, cu awe a keda entrega na Den Haag na Minister di Finansa di Aruba, Angel Bermudez, y Ministro di Asuntonan Interno y di Relacionnan di Reino, Ronald Plasterk.

Entre 2000 y 2016, den cuadro di e relacion di cooperacion entre Aruba y Hulanda, a ehecuta seis programa di mas aña. Tur dos pais a deposita placa den e fondo di Fondo Desaroyo Aruba (FDA) pa esaki. A financia 763 proyecto cu Fondo Desaroyo Aruba den e periodo aki, cu un balor total di 500 miyon Florin Arubano (mas cu 263 miyon euro), reparti den e sectornan calidad di gobernacion, enseñansa, salud publico, desaroyo economico duradero, mantencion di ley y Producto Aruba.

Riba encargo di Hulanda y Ministerio di Finansa y Organisacion di Gobierno di Aruba, SEO Investigacion Economico a evalua e seis programanan di mas aña di Fondo Desaroyo Aruba den e periodo di september 2016 te cu maart 2017. Pa esaki a haci investigacion riba efectividad, eficiencia, e potencial cu a keda sin uza y durabilidad di e programanan di mas aña.

For di dia di creacion di Fondo Desaroyo Aruba, Hulanda a deposita den careda di 291 miyon florin Arubano (153 miyon euro) den e fondo di desaroyo Fondo Desaroyo Aruba, y Aruba mes a deposita 251 miyon Florin Arubano (132 miyon euro).

E ultimo deposito di Hulanda tabata na januari 2013 y e ultimo deposito di Aruba tabata na cuminsamento di 2017. E proyectonan cu ainda ta andando, cuanan Fondo Desaroyo Aruba ta maneha, ta financieramente likida pa mas tarda fin di september.

Segun planificacion, Hulanda lo stipula e contribucion definitivo na e fundacion aki,  prome cu fin di e aña aki ainda. Ta intencion cu fundacion Fondo Desaroyo Aruba lo keda disolvi pa mas tarda dia 31 di december 2017.

Texto bou di e potret: di robes pa drechi: John Newton (presidente di comision di guia di rapport di evaluacion), minister Ronald Plasterk y Angel Bermudez (minister di Finansa di Aruba).

Image: Imagen: BZK / Valerie Kuypers.