Koenders: Hunto cu paisnan Caribense duna contenido na relacionnan exterior

“Como minister di Relacionnan Exterior pa henter Reino, ami ta sostene e interesnan di tur pais di Reino. Hunto nos ta duna contenido na nos relacionnan exterior. P’esey ta importante pa mi mantene contacto intensivo cu e paisnan Caribense di Reino.” Esaki ta loke minister Koenders a bisa na Corsou, despues di e Koninkrijksoverleg Buitenlandse Betrekkingen (Consulta di Relacionnan Exterior di Reino) cu Minister Presidentnan di Aruba, Corsou y Sint Maarten.

Koninkrijksoverleg Buitenlandse Betrekkingen (KOBB) met de minister Koeders en de ministers-president van Aruba, Curaçao en Sint Maarten op 5 mei 2015.

Minister Koenders a bisa na Corsou, despues di e Koninkrijksoverleg Buitenlandse Betrekkingen (Consulta di Relacionnan Exterior di Reino) cu Minister Presidentnan di Aruba, Corsou y Sint Maarten

“Como minister di Relacionnan Exterior pa henter Reino, ami ta sostene e interesnan di tur pais di Reino. Hunto nos ta duna contenido na nos relacionnan exterior. P’esey ta importante pa mi mantene contacto intensivo cu e paisnan Caribense di Reino.” Esaki ta loke minister Koenders a bisa na Corsou, despues di e Koninkrijksoverleg Buitenlandse Betrekkingen (Consulta di Relacionnan Exterior di Reino) cu Minister Presidentnan di Aruba, Corsou y Sint Maarten.

“E consulta di Reino aki ta é momento den aña pa repasa cu e tres minister presidentnan e temanan mas imporante riba tereno di relacionnan exterior”, segun e minister. “Union den maneho exterior ta esencial pa atende interesnan di Reino, incluso esunnan di e paisnan.”

E minister a bisa cu e lo para fuerte internacionalmente pa cu interesnan di e partinan Caribense di Reino. El a enfatisa cu participacion den e tereno internacional ta bay man den man cu derecho- y debernan. “Internacionalmente por procede contra Reino pa obligacionnan di tratado, bon gobernacion y derechonan humano”, segun e minister.

Den cuadro di harmonisacion di e maneho di visa Caribense, e cuater paisnan a cumbini cu otro pa, pa entrante dia 1 di juli 2015, duna dispensacion di visa pa Colombia, valido pa Corsou y Sint Maarten, anticipando e posibel dispensacion pa e teritorio Schengen. Lo evalua e decision aki na juli 2016. Pa Aruba y Hulanda Caribense lo otorga e dispensacion di visa pa Colombia, asina cu e dispensacion di visa drenta na vigor pa tur dos pais pa e teritorio Schengen. Lo evalua e dispensacion di visa di Colombia pa Aruba y Hulanda Caribense un aña despues cu e dispensacion di visa pa Aruba y Hulanda Caribense a drenta na vigor.

Durante e deliberacionnan tambe a trata e desaroyonan den region. Koenders a yama e acercamento entre Cuba y Estadonan Uni di Merca historico. El a subraya e importancia di e proceso di reformacion cu Cuba a cuminsa riba tereno politico y economico. “Esaki tambe ta ofrece oportunidadnan. Pa motibo di cercania tin pa e Paisnan oportunidadnan interesante pa mas cooperacion riba tereno di comercio, energia, ciencia medico y derechonan humano”. Dia 7 di mei minister Koenders lo bishita Cuba.

Ta natural cu a papia tambe riba e desaroyonan na Venezuela, e pais bisiña mas grandi di Reino. “Bon vecindad ta e base di e relacion entre Reino y Venezuela”, segun Koenders.

Aruba, Corsou y Sint Maarten tin cada un, nan autoridad autonomo pa promocion comercial. E minister a bisa cu embahadanan Hulandes, consuladonan y representantenan permanente ta na disposicion di tur e paisnan di Reino: “Gobiernonan, empresanan y ciuidadanonan di Aruba, Corsou y Sint Maarten semper por acerca e “postennet” pa asisti na ehecucion di nan ambicionnan economico. Tambe por uni na misionnan comercial. Ta bon pa observa cu esaki ta sosode mas y mas, por ehempel relaciona cu Panama, Colombia y djis ey tambe cu Cuba.”

Pa motibo cu e paisnan Caribense ta forma parti di Reino, nan no ta bini na consideracion pa mayoria di e fondonan di desaroyo. Pero como estadonan chikito di isla (SIDS – Small Island Developing States), nan tin si un problematica specifico di desaroyo. Minister Koenders a bisa cu mundialmente Reino ta reconoce e posicion special y circunstancianan di estadonan chikito di isla. “Asina, na luna di september, Reino a pasrticipa na e conferencia di SIDS na Samoa, cu un delegacion fuerte, lidera excelentemente pa minister president Eman”, segun Koenders.

El a bisa cu Reino ta esforsa su mes den e negociacionnan tocante Post-2015 Agenda di Metanan Duradero di Desaroyo di Organisacion di Nacionnan Uni pa por yega na elaboracion di e circunstancianan special di e islanan chikito aki den e metanan.

Den conexion cu Organisacion di Nacionnan Uni, e minister a señala cu Reino Hulandes ta spera di por obtene un asiento den Conseho di Seguridad di Nacionnan Uni na 2017. “Esaki ta enfaticamente un candidatura amplio di Reino. E cuater paisnan di Reino Hulandes ta core campaña hunto pa bira miembro di Conseho di Seguridad di Nacionnan Uni. Pa e motibo ey tambe nos tin e lema: ‘Kingdom of the Netherlands, One Kingdom – Four Countries; European and Caribbean’ (Reino Hulandes - Un Reino – Cuatro Pais; Europa y Caribe).”

Na final Koenders a gradici minister president Asjes pa su recepcion caluroso na Corsou. El a felicit’e cu presidencia di OCTA (Overseas Countries and Territories Association). “Mi ta contento cu e rol activo di Corsou den e relacionnan cu Union Europeo. E prioridadnan di e presidencia Curasoleño tabata bon scogi; un miho cooperacion den region y cu Union Europeo.” Na Corsou e minister a papia tambe cu Gobernador George-Wout, cu minister Palm (Desaroyo Economico) y cu Presidente di Vereniging Bedrijfsleven Curaçao (Asociacion di Comerciantenan na Corsou).

Pa conclui su bishita na Corsou, minister Koenders a bishita un base di marina, for di unda tambe Hulanda ta apoya operacionnan di combatimento di droga den teritorio di Caribe. Minister Koenders: “Mi ta impresiona di e esfuerso di guardacosta y otronan, pa combati via e operacionnan aki, contrabanda di droga y pa duna un contribucion na seguridad y stabilidad regional.”

Corsou ta e di dos parada di Koenders durante un biahe na e paisnan Caribense di Reino – Aruba, Corsou, Sint Maarten – y e paisnan Latino Americano Cuba, Guatemala y Mexico.

Minister Koenders bezoekt de marinebasis op Curacao

Pa conclui su bishita na Corsou, minister Koenders a bishita un base di marina