Hulanda y Aruba ta yega na un acuerdo

Diasabra cu a pasa gobierno di Hulanda y Aruba a yega na un acuerdo encuanto supervision financiero independiente, pa garantisa compromisonan cu a wordo haci y estimacionnan multianual cu gobierno di Aruba a stipula. E esfuersonan aki ta enfoca den logra un balansa presupuestario.

For di dia 1 di augustus binidero College Aruba Financieel Toezicht lo supervisa di forma independiente normanan cu ya caba a keda defini y acorda. E colegio aki lo consisti di un miembro di parti di Reino, un miembro di parti di Hulanda y un miembro di parti di Aruba. Na momento cu logra un balansa presupuestario duradero, un propio Begrotingskamer estableci door di Aruba den cooperacion cu Hulanda, lo tuma e tarea aki riba dje. Gobierno di Aruba lo entrega un proyecto di ley na Parlamento di Aruba, cu ta regla e supervision structural independiente.

Cu e acuerdo aki ta yega un fin na deliberacionnan largo riba e forma di supervision riba finanzas publico duradero di Aruba.

E reunion entre Prome Ministernan Eman y Rutte na Panama riba e tema aki, a crea un bon base di confiansa pa logra e resultado aki. Den e cuadro aki e gobiernonan di Hulanda y Aruba a sigui den deliberacion cu otro despues di e reunion di Conseho di Minister di Reino riba 24 di april ultimo y por a yega cu Minister Plasterk na un proposicion alternativo.

Tanto Minister President Mike Eman, como Minister di Asuntonan Interior y Relacionnan di Reino Ronald Plasterk tabata masha satisfecho cu e resultado aki. Ambos pais lo informa nan Parlamentonan di e acuerdonan haci durante e dianan cu ta sigui.