Bishita di secretario di estado Weekers na Sint-Maarten, islanan BES, Curaçao y Aruba

Dialuna, dia 20 di juni, secretario di estado Frans Weekers di Finanzas ta cuminsa un bishita di ocho dia, respectivamente na Sint-Maarten, Sint-Eustatius, Saba, Bonaire, Curaçao y Aruba. Meta di e bishita di e secretario di estado ta sera conoci y hiba combersacion riba legislacion fiscal, y e ta coincidi parcialmente cu e programa di minister Donner na e islanan Hulandes Caribense.

Dialuna, na su yegada na Philipsburg, e secretario di estado lo bishita minister di Finanzas Hiro Shigemoto y management di Servicio di Impuesto. Un di e asuntonan cu lo trata ta prevencion di pago dobel di impuesto door di habitantenan y sector priva di Saba y Sint-Eustatius, cu ta cumpra hopi producto na Sint-Maarten.

Diamars, diaranson y diahuebs e secretario di estado ta bishita Sint-Eustatius, Saba y Bonaire. Riba agenda di e programanan na e tres islanan tin combersacion cu e tres gezaghebbernan y e Bestuurscollegenan. Lo e papia tambe cu sector priva, servicio di impuesto y cuerpo di aduana. Cu e bishita aki e secretario di estado ta cumpli cu su promesa na parlamento, cu lo e trata extensamente cu representantenan di e tres entidadnan publico en cuestion tocante e sistema fiscal cu a introduci na e tres islanan entrante 1 di januari 2011.

Diabierna e secretario di estado ta biaha pa Curaçao. Despues di un bishita na gobernador Frits Goedgedrag, e ta papia cu minister di Finanzas Jorge Jamaloodin. Siguientemente e tin un combersacion cu presidente di Banco Central, Emsley Tromp. Weekers lo hiba deliberacion tambe cu representantenan di e tres conseheronan fiscal di Curaçao, CIFA y IFG.

Dialuna, dia 27 di juni, e secretario di estado ta clausura su bishita na e parti aki di Reino cu un bishita na Aruba, caminda e tin combersacion cu respectivamente gobernador Fredis Refunjol, prome minister Mike Eman y cu minister di Finanzas Mike de Meza. E deliberacionnan en cuestion ta den cuadro di progreso di e negociacionnan cu ta concerni un Areglo Fiscal nobo di Reino (BRK) entre Aruba y Hulanda. Aruba ta e prome pais cu cual Hulanda a delibera y caba di negocia un BRK nobo.

Tira bista tambe na