Bishita di ministernan Donner y Leers na Sint-Maarten, Aruba y Corsow

Diadomingo, dia 3 di april, minister Piet Hein Donner di Asuntunan Interior y Relacionnan di Reino y minister Gerd Leers di Inmigracion i Asilo ta cuminsá un bishita di trabou di cinco dia na respectivamente Sint-Maarten, Aruba y Corsow. Durante e bishita aki lo trata en particular dos tema.

Na prome luga vision di futuro riba Reino. Minister Donner kier hiba debido deliberacion cu e tres paisnan en cuestion riba nan vision di Reino. Asina e ta duna contenido na e promesa cu el a hasi durante su bishita na januari.

Como di dos tema lo trata trafico di persona den Reino entre e diferente paisnan. E minister responsabel pa esei, señor Leers, kier papia cu tur esnan envolvi tocante e puntonan di salida pa trafico di persona, prome cu gabinete hulandes bini cu un proposicion di ley.

Na e tres islanan lo tuma ampliamente tempo pa delibera riba e dos temanan en cuestion, tantu cu e respectivo gobernantenan como cu e presidentenan di fraccion di e parlamentonan. Na tur e tres paisnan prome bishita di e ministernan lo ta na e respectivo gobernadornan. Ademas, diawebs, dia 7 di april, minister Donner lo delibera na Corsow cu e gobernadornan di e tres paisnan. Esei lo ta prome biaha cu e gobernadornan di Aruba, Sint-Maarten y Corsow, conhuntamente, lo hiba un deliberacion asina cu e minister di Relacionnan di Reino.

Ademas di e dos temanan general lo delibera tambe riba algun otro tema. Por ehempel, minister Donner lo papia na Sint-Maarten tambe riba estado actual di e trabounan cu ta tumando luga rondo di presupuesto di Sint-Maarten en relacion cu e consehonan di e Comision di Supervision Financiero (CFT). Na Aruba e dos ministernan lo tin Consulta Gubernamental durante cua lo trata e Cadena di Estranhero (Vreemdelingenketen) cu minister Sevinger di Infrastruktura, Integracion y Medio Ambiente y cu minsiter Dowers di Husticia y Enseñansa.

Durante e consulta aki lo combersa, entre otro, riba e ley di Atmicion y Expulcion. Durante e bishita di cinco dia minister Leers lo bishita tambe tanto Sint-Maarten como Corsow e organisacion di admision y servicio di inmigracion.