Presupuesto Capitulo IV Relacionnan di Reino

Ultimo añanan a traha duro na e relacionnan nobo den Reino. Na aña 2011 Curaçao y Sint Maarten tin status di pais. Boneiro, Saba y Sint Eustatius ta bira "bijzondere gemeenten" di Hulanda. 2011 ta e aña den cua ta sigui ehecuta e palabracionan hasi y ta implementa e leynan concerni. Cu desmantelacion di e pais Antiyas Hulandes, un capa di gobernacion ta keda elimina. Danki na esey e gobiernonan por ta mas efectivo den dunamento di servicio na publico y den proteccion di interesnan di e pueblonan.

Boneiro, Sint Eustatius y Saba

Entrante dia 10 di oktober 2010, Boneiro, Sint Eustatius y Saba ta bira entidad publico, cu un structura similar na esun di gemeente hulandes. Gobierno di Reino Hulandes ta tuma e papel over di gobierno central di e pais Antiyas Hulandes desmantela. Esey ta nifica cu mandatarionan Hulandes ta carga responsabilidad politico pa nan diferente areanan di maneho na e tres islanan en cuestion.

Curaçao y Sint Maarten

Por lo pronto Hulanda ta duna sosten na e dos paisnan nobo pa loke ta funcionamento di nan organisacionan nobo como pais. Pa e aspectonan di e entidadnan di gobierno cu no ta funciona ainda of no ta funciona debidamente riba e fecha di transicion, tin planan cla pa e manera cu lo atende cu nan. En principio ehecucion di e planan ta pa maximo dos aña. Na 2011 e paisnan nobo lo pone central e implementacion di e planan pa atende e asuntonan en cuestion.

Aruba

Aruba y Hulanda a conveni un agenda conhunto. Cu e agenda aki e dos paisnan aki kier implementa - tambe na 2011 - mehoracion riba tereno di mantencion di ley, ambiente di biba den centro di ciudad y legislacion. Segun expectativa, na principio di 2011, lo conclui e investigacion di estado di e gobernacion di Aruba. A base di resultado di e investigacion ey ta dicidi si tin motibo pa tuma mas medida y, si esey ta e caso, riba cua nivel esey mester tuma lugar. En todo caso, cu determinacion mester sigui mehora tanto e instancianan cu ta atende cu asunto di stranhero ("vreemdelingenketen") como tambe Cuerpo Policial di Aruba. Esey ta primeramente responsabilidad di Aruba, loke ta e caso tambe pa e situacion financiero preocupante di e pais. Gobierno Arubano ta hasi esfuerzo pa mehora e situacion.

Vision riba Reino

Cambio di e relacionan estatal ta rekeri un vision nobo riba Reino. Un vision den cua ta importante tambe un contenido transparente di e funcion di garantia cu ta ankra den Statuut. Na aña 2011 lo presenta un nota na Tweede Kamer tocante un vision riba Reino pa termino largo.