Dia 6 di september 2017, horcan Irma a arasa (a pasa riba y destrui) e islanan Sint Maarten, Saba y Sint Eustatius. Principalmente Sint Maarten a sufri e daño mas grandi di Irma. Hopi cas y e infrastructura a keda destrui. Hulanda a duna yudansa di emergencia te dia 1 di december 2017. Despues Hulanda a cuminsa cu su contribucion na reconstruccion di Sint Maarten. Pais Sint Maarten mes ta responsabel pa e reconstruccion.
Papel di Hulanda den e reconstruccion
Hulanda a destina € 550 miyon pa reconstruccion di Sint Maarten. Hulanda a pone 2 condicion na e yudansa aki:
- cu ta stablece un camara di integridad;
- cu ta mehora vigilancia na frontera.
Parti di e placa ta pa sosten directo. Banco Mundial ta maneha mayoria parti di e cantidad (te na un maximo di € 470 miyon). Pa esaki a crea un fondo di maneho (trustfund). Ta paga e suma na cuota.
Na final di aña 2017 Hulanda a duna mesora € 7 miyon pa proyectonan cu lo por a start rapidamente y cu por a duna resultado inmediato pa e poblacion. A yama esakinan “early recovery projects” (proyectonan di recuperacion trempan). Por ehempel:
- drechamento di cas pa hendenan di edad avansa;
- restauracion di instalacionnan pa personanan cu malesa cronico y esnan incapacita;
- yudansa pa mucha- y hobennan.
Por mira tur e proyectonan di recuperacion trempan den e bista general.
Papel di Banco Mundial den reconstruccion
Banco Mundial ta maneha parti di e contribucion Hulandes (te na un maximo di € 470 miyon) via un fondo di maneho (trustfund). Banco Mundial ta yuda Sint Maarten elabora un plan di reconstruccion yama “National Recovery and Resilience Plan (NRRP)”, esta, Plan Nacional di Recuperacion y Resistencia.
Ta uza e fondo (Trustfund) pa crea proyecto. Esakinan mester cumpli cu e rekisitonan di Banco Mundial. E rekisitonan ta garantisa cu ta gasta e placa na un manera husto.
Ta saca/entrega e cantidad di € 470 miyon na cuota. Ya a destina € 262 miyon pa cierto proyectonan pa, por ehempel:
- haci e isla mas resistente pa horcan;
- drecha e tuberianan di awa y electricidad;
- drecha e aeropuerto;
- realisa programa di formacion y sosten pa hendenan cu a keda sin trabou pa motibo di e horcan;
- drecha y expande e hospital;
- monta un forma sostenibel pa deshaci di sushi;
- duna empresanan mediano y chikito asistencia financiero.